تكلم عن تخصصك

السلام عليكم ورحمة الله وبركاته

هذا الموضوع قد وضعته لكي يتحدث كل عضو في المنتدى عن تخصصه او التخصص الذي يريد دخوله عند دخوله الجامعة .

اولا لماذا اخترت هذا التخصص؟
ثانيا هل هذا هو التخصص الذي كنت تحلم به؟
ثالثا هل انت مرتاح في تخصصك الان؟
رابعا هل انت مرتاح في الجامعة التي تدرس فيها؟
خامسا حدثنا عن تخصصك.
وشكرا

اتمنى المشاركة من الجميع
وصلى الله وبارك على سيدنا محمد وعلى آله وصحبه اجمعين

بشكرك اخي المصمم عالموضوع وبما انه ماحده حابب يحكي عن تخصصه فقررت اكون اول واحدة بتدلي بدلوها على امل اني اكون قدم خير عالموضوع ويتجرؤا الاعضاء ويكتبوا
انا متلي متل بقية الطلاب اكيد معدل التوجيهي هو رح يقرر مصير تخصصي
بس انا كنت حاطة ببالي الهندسة هندسة شو مابعرف وليش وكيف كمان مابعرف المهم هندسة
وبعد مانجحت بالفصل الاول وجبت معدل بحرز بفوتني عالهندسة بالراحة اشتغل عنصر الطمع وحكيت مابفوت الا هندسة معمارية وهاي يا جماعة الخير زي مابتعرفو ادنى قبول الها في بلدنا العزيز 94 وانا من وين بدي اجيب هالعلامات بس كنت حابة كتير التخصص وبلشت الفصل التاني نحت كل اشي اسمه عندي دراسة بصحى عالدراسة ونومي الدراسة واكلي وشربي كله دراسة واجى المعدل اقل من المطلوب بشوي موكتير بس يلا عبيت الطلب وتوكلت على الله
واخيرا والحمد لله طلعلي التخصص اللي حلمت فيه بس الجامعة (مش ولا بد) انا ما زرتها من قبل بس اسمعت عنها كتير واسمعت انه ماحده بحب يسجل فيها قلت لنفسي انا شوبدي بالجامعة المهم التخصص وهمه خمس سنين وبمضوا
نزلت من الباص على اساس عالجامعة وعينكم تشوف اللي شفته قدامي صحر ووراي صحرا ويميني ويساري كمان برضه صحرا حكيت ياجماعة الخير وين احنا ؟!!!!!!!!!!!!!!!!!!!!!!!!!!!!
وفت الباب اللي مفروض انه باب جامعة بس وين الجامعة ياجماعة (امشو شوي بتوصله الجامعة) هيك قالوا ومشينا.................. ومشينا............... ومشينا.............. ووصلت روحنا الحلقوم وماكنا نوصل الجامعة لكنا اخيرا شفنا علامة خير مبنى كبيييييييييييييييييييير بيتكون تقريبا اكتر من........... مش متزكر بس ياإما طابق او طابقين بس عشان الحلال والحرام اتزكر مزبوط اه اه طابقين طابقين وكان كل مبنى بالجامعة مابيتكون الامن طابقين لانه كانت الجامعة معسكرات لللجيش قبل ما تصير جامعة هيك حكولنا كمان
المهم دحلت يعني سلكت بالجامعة وشوي شوي تعودت عليها وحبيتها كتير واللي حببني فيها اكتر التخصص اللي بحبه كتيييييييييييييييييييييييير وصرت ما احب اليوم اللي بنعطل فيه
واماعن تخصصي فكله والحمد لله رسم خمس ساعات توقف عالمرسم صحيح تعب بس اكيد ممتع وحلو وفيه ماده التصميم هاي المادة بتنسى فيها النوم واحنا كطلاب عمارة صار من الطبيعي انه ماننام 3 ايام بس اكيد مو من الطبيعي انه ننام 8 ساعات متواصلة لانه النوم بوجهة نظرنا مرهق للعينين وبشل التفكير والابداع بس والله انه بجنن وبنصح كل طلاب التوجيهي يكون نظرهم عالي شوي ويحطوا هدا التخصص ضمن آمالهم وطموحاتهم
وبتمنى مااكون طولت عليكم واكيد استثقلتوا دمي معلش معلش بس هدا اللي اجاكم والحق موعلي كله عالمصمم الفتحاوي اللي حط الموضوع

أتمنى لك التوفيق في دراستك وفي مجال عملك وإنشالله تصمميلنا مبنى خاص بالمنتدى عشان نصير نشوف بعضنا

الله يوفقك يا أختي وانشاء الله تتخرجي بتفوق ويصير عندك مكتبه الهندسه الي بتحلمي فيه

انا كنت شاطرة في الرياضيات و الكيمياء و كنت اقول بدي ادخل كيمياء في الجامعة .. و دخلت بس ما كملت لاني ما رتحت فيه و كمان بدي اقضي 3 او 4 ساعات في المختبر قما كملت ....
المهم غيرت الى رياضيات و كمبيوتر .. و الحمد لله كتير مرتاحة بالتخصص و انا بحب الرياضيات كتير
المادة المفضلة عندي ... بستمتع كتير و انا بحل رياضيات .. جامعتي كتير حلوة بس لاني في بلد غربة ما في كتير عرب و ما في اصحاب ... يعني دراسة و بس ... جامعة البلاد مسلية اكتر ...
بس ماشي حالي ...
الله يوفق الجميع .. و اهم شي انو الواحد يحب اللي يدرسوا

مشرف. عدد الرسائل : 1582 تاريخ التسجيل : 06/04/2008

الله يوفقكم جميعا
وانش اء الله بتحققو كل طموحاتكم واحلامكم

انا من زممان كنت حاطةب ببالي ادرس هندسة
بس قبل التوجيهي راح هالامل
لانو بلشت اشوف الصعوبة في الدراسة لهيك شلت هالفكرة من راسي وحكيت الي بجيبه معدل التوجيهي
والحمد لله
انهيت التوجيهي بمعدل بفوتني هندسة
اكييد انبسطت بس كنت مفكرة انو التوجيهي هو اكبر صعوبة وبعديها بنرتاح عطوول يا سلام

بس وينكمم الجامعة اصعب بكتير من التوجيهي
يرحم ايامه
ودخلت الهندسة
التخصص الوحيد الي بتخصص من اول سنة هو المعماري بس ما كنت بدي اياه لانه تعب عطوول اللله يعينك يا روز مون
والتخصصات التانية بنتخصص عالسنة التانية
وهيني باخد صيفي وبعد الصيفي الي بجيبه معدل التخصص بروحة

ان شاء الله خير

مع تمنياتي بالتوفيق لكل الاعضاء
ونتائج موفقة للتوجيهي

انا نفسي ادرس شي فيه حركه ونشاط وشغل شركات وهيك
بس الظروف ما سمحت نهائيا
ودخلت تخصص بكره يلا احسن من بلاش
صحلنا جوز حكينا عنه اعور
هههههههههههههههههههه مثل بسيط بيشرح الحاله

وانا تخصصي لغة انجليزية بس اخترته لانه ما تخصصات حلوة بالجامعة اللي بدرس فيها وكمان اهلي نصحوني اني اتخصص انجليزي وانا عجبني التخصص ولاني بحب اتعلم لغة ثانية غير اللغة العربية بس طبعا اللغة العربية بتضل هي الاساس والاصل
بكفي انها لغة القران الكريم

يا عم يا عم
نيالي بتخصصي
لا كيميا ولا فيزيا
بس في مواد زي الطب
منتحمل شو منا نعمل وفي رياضيات ونجلش
اعرفتو شو تخصصي
انا بحكيلكم
تربيه رياضيه
بدها نشاط
موفقين جميعكم

--------------------------------------------------------------------------------

شكرا
شكرا شكرا
شكرا شكرا شكرا
شكرا شكرا شكراااا شكرا
شكرا شكراا شكرااا
شكرا شكرا
شكرا

تقبل مرررروووررررررررري

والله يا شباب انا مكيف بتخصصي

انا متخصص علوم ماليه ومصرفيه
يعني الواحد ضامن مستقبلو
بكره بنفوت ع البنك منهفلنا كمن مليون وبنطلع
محدا شاف حدا
شغله حلوه كتير
متخافوش منرش شوي عليكم
والله مني ناسيكم

لعاد يا أخ BMV318i
لا تنسانا بمليون بس مش حيالله مليون لا أرضى بأقل من مليون $ والا إسمنا أولاد بلد وحدة على الفاضي

ولا تنسانا بوظيفة في أحد البنوك اللي بدك تختلس منها

انا تخصصي لا فيزيا ولا كيميا ولا احياء ولا علوم ارض
انا تخصصي فيه شوية رياضيات و ادارة ومحاسبة واحصاء ودين وعربي ونظم و انجليزي
وحاسوب يعني مواد مش صعبة ولا سهلة بدها فهم وحفظ
عرفته التخصص
ادارة معلوماتية

انا كنت بدي ادرس طب اسنان من قبل ما ادخل عالتوجيهي
ودرست عشان اجيب المعدل اللي يدخلني اياه
والحمد لله دخلت وهيني مشي حالي فيه الحمد لله
بس للامانة انو صعب
والجامعة الحمد لله كويسة ولا احلى

انا خريج كلية العلوم التربويه تخصص مغلم صف يعني مربي اجيال والله يكون بعون الجيل الي بدو يطلع من تحت ايدي

اها انا شفت كل تخصصاتكوا انا تحصصي الدفاع عن الوطن بكل ما املك وكل شي بملكه ورايح ما اخيب ظنوا وبامل يكون معي بهاد التخصص اكمن واحد اوك شباب صبايا وانا بدرس هندسة مدنية ..بناء وانشاء.......ورايح استخدمها للوطن واهلوا بس التخصص الاصلي الدفاع عن الوطن بكل واغلى ما املك وتحياتي للجميع \\\

في متلي بالتخصص هون
امورة وانا متلك رياضيات
بس انا ماالي علاقه بالهتخصص
ولما اكون ادرسه اعرفي في شي بخنق فيه
بس الحمدلله ماشين فيه
وطبعا عالاكيد
ومو معتمد عليه بالوظيفه
بس اللهم شهادت بكالوريوس بالدرج ونزيد عدد الخريجين
ممكن اخد دورات تغنيني عنها او كمل ماجستير لشي بحبو
ولنتخرج الله بفرجها

انا تخصصي it يعني تكنلوجيا معلومات طبعا انا بدرس سنتين يعني دبلوم 75 ساعة

والله يجيب الي فية الخير

موضوع: رد: تكلم عن تخصصك الأحد مارس 08, 2009 9:23 am

أما انا لسا ما تخصصت بشي
لسا المستقبل ئدامي
بدي أخلص المرحلة الابتدائية وبعدين الاعدادية ويالله السلامة المرحلة الثانوية
الله بعين كلها عضت كوساية وبخلص

عضوت كوساي حكتيلي
طيب ديري بالك تبلعي الكوساي